Serikali ya Magazeti na Matapishi ya Ile ya Uwazi wa Kificho

Sijajua sana kuwa ni janja ya serikali kuwapa upya ruksa shirika lisilo la kiserikali la HakiElimu ya kuendelea na shughuli zake za utafiki wa hali ya Elimu Tanzania au vinginevyo. Majuzi waziri wa wizara inayoshugulikia pamoja na mambo mengine elimu, Magreth Sitta, aliwataka HakiElimu waiangukie Serikali (iliyopata umaarufu sana vyumba vya habari) ili waendelee na shughuli zao za utafiti na utoaji hali halisia ilivyo.

(Watoto wamekaa chini huku wenzao wakitanua 'International Schools")

Kesho yake HakiElimu wakasema hawaombi msamaha ng'o kwani walilokuwa wakilifanya ni ukweli na wala si uzandiki kama ilivyodhaniwa na waziri aliyemtangulia katika serikali ya "Uwazi na ukweli" Joe Mungai. Namimi nadhani hivyo pia. Hata hivyo baadhi wa wachambuzi wana mashaka na 'uwazi na ukweli' huo. Msome mzee wa Kitimoto hapa.

Yawezekana kuwa serikali hii yataka kufunika yale mauza-uza ya zama za uwazi na kutoka kivyao. Lakini swali ninalojiuliza kuna haja gani ya kuja kimgongo kama anavyokuja Mage Six. Haitoshi kuwaruhusu tu au ni kutunziana heshima watu wazima. Hivi yale waliyokuwa wakiyasema HakiElimu ni uwongo na uzandiki. Ama Joe alikuwa na lake.

Hebu fikiria jiografia na historia eti vilifanywa somo moja. Huu haukuwa mwanzo wa kuandaa kizazi ambacho kinajua historia na jiografia ya nchi yao nusu nusu. Mfano 'Nyerere' wangemjua kwa jina la 'Nyere', 'Mkwawa' 'mkwa', 'Maji maji' 'maji' . Mungai alikuwa anatupotosha.

Sasa kwenye hili la HakiElimu. Kwa mfano nani asiyejua kuwa badala ya kubukua watoto hufanyishwa shughuli hata zisizo za shule kama kuwachania walimu kuni ama kuwatekea maji. Mjadala waweza kuzuka kuwa elimu ile inamjenga mwanafunzi kuwa mshiriki mwema wa kazi zinazohusu mazingira waliyomo lakini yafaa nini kazi hizo zihamie hata kwa nyumba za walimu. Sijui mliosoma mijini na shule kama za Tanganyika lakini mie maji niliyachota kuni nilizibeba.

(Watoto wakipandisha buku pasi na madawati huku wakiwa hoi kwa mizigo ya kuni)

Swala langu hapa vipi ndani ya siku 100 tu waheshimiwa wanaumbuana namna hii. Yaelekea HakiElimu walikuwa na hoja. Suala ambalo nilikuwa nalipigia upatu. Hoja ya waziri Joe kuwa yapo mazuri ambayo HakiElimu hawayaonyeshi katu haiswihi.Hivi alijisikiaje pale Mage alipokuwa 'akimkanusha' kinamna bungeni. Makene huwa-ga anasema kama kuna mazuri waliyafanya hawapaswi kusifiwa kwani ni wajibu wao. Hebu fikiria kumpongeza mzazi kwa kumpeleka mototo shule. Anafaa asifiwe kwa lipi? Sio wajibu wake? La uongo lipi walilolisema HakiElimu.

Panapo ukweli uwongo hujitenga mithili ya mafuta yajienguapo yachanganyikapo na maji.